ជាការបញ្ចាំងភាពយន្តឯកសារដែលឆ្លុះរំលេចអំពីភាពច្នៃប្រតិដ្ឋរបស់យុវជន ជាពិសេសយុវជនជនជាតិដើមភាគតិចលើសិទ្ធិក្នុងការសម្រេចចិត្ត អត្តសញ្ញាណ ជីវភាពរស់នៅ និងប្រពៃទំនៀមទម្លាប់ដែលផ្សារភ្ជាប់យ៉ាងស៊ីជម្រៅជាមួយនឹងលក្ខខណ្ឌធម្មជាតិនៅក្នុងសហគមន៍របស់ពួកគេ។
ថ្ងៃចាក់បញ្ចាំង៖
៩ ខែធ្នូ
ទីតាំង៖ មជ្ឈមណ្ឌលសោតទស្សន៍ បុប្ផាណា
«ម្ហូបដូនតា»
ក្នុងនាមជាសកម្មជនសហគមន៍នៅភូមិចង្ហូរខ្នា ក្នុងខេត្តកំពង់ធំ អ្នកស្រី រស់ គាល រស់នៅពឹងអាស្រ័យអនុផលពីព្រៃសហគមន៍ ។ ដូចអ្នកភូមិដទៃដែរ អ្នកស្រីជាអ្នកចម្អិនអាហារប្រចាំថ្ងៃសម្រាប់គ្រួសារគាត់ ។ យ៉ាងណាក៏ដោយ សព្វថ្ងៃនេះ ដោយសារអាកាសធាតុមិនអំណោយផល បន្លែធម្មតាមួយចំនួន ដែលអ្នកស្រីធ្លាប់រកបាននៅក្នុងព្រៃក៏មិនឃើញមានទៀតដែរ ។ ភាពខ្វះខាតនេះមិនត្រឹមតែប៉ះពាល់ដល់ការរស់នៅរបស់អ្នកស្រីប៉ុណ្ណោះទេ ថែមទាំងគំរាមកំហែងដល់កម្មសិទ្ធិដីធ្លីរបស់សហគមន៍ជនជាតិដើមភាគតិចរបស់អ្នកស្រីទៀតផង ។
«ក្តីសង្ឃឹម»
តៅ ជីវ៉ា ឈប់ពីការសិក្សា ហើយរៀបការទាំងនៅវ័យក្មេង រីឯ ក្រូយ គ្រីម រៀនចប់វិទ្យាល័យ និងធ្វើការនៅធនាគារក្នុងខេត្តរបស់នាង ។ ពួកគេទាំងពីរជាជនជាតិទំពួនដូចគ្នា ប៉ុន្តែបានជ្រើសរើសផ្លូវអប់រំខុសៗគ្នា ។
«ចម្ការថ្មី លើដីចាស់»
អ្នកស្រី ពុត វឿន ដាំដំឡូងមីក្នុងដីភូមិ រីឯប្តីរបស់អ្នកស្រីធ្វើស្រែចម្ការនៅភូមិចង្ហូរខ្នា ខេត្តកំពង់ធំ ដើម្បីរកលុយទិញអង្ករ ។ គ្រួសារនេះ ត្រូវបង្ខំចិត្តបោះបង់ការធ្វើស្រែបែបជនជាតិដើមភាគតិច ដោយសារតំបន់ព្រៃសហគមន៍កំពុងត្រូវបានកាប់ឆ្ការកាន់តែខ្លាំងឡើង ដើម្បីដាំដំណាំកសិឧស្សាហកម្មវិញ ។ ការកាប់ឈើបានធ្វើឲ្យអាកាសធាតុប្រែប្រួលប៉ះពាល់ដល់ការធ្វើស្រែ ។ ជាលទ្ធផល ដូចកសិករជាច្រើនដទៃទៀតនៅក្នុងភូមិរបស់អ្នកស្រីដែរ អ្នកស្រីបានប្តូរពីការធ្វើស្រែមកដាំដំណាំនេះ ដោយសង្ឃឹមថានឹងទទួលបានប្រាក់ចំណូលកាន់តែប្រសើរ ។ ប៉ុន្តែនៅទីបំផុត អ្នកស្រីស្ថិតក្នុងស្ថានភាពដូចពីមុនការផ្លាស់ប្តូរអ៊ីចឹង។
កម្រងរូបភាព
